اب خوشی ہے نہ کوئی درد رلانے والا

اب خوشی ہے نہ کوئی درد رلانے والا 
ہم نے اپنا لیا ہر رنگ زمانے والا

ایک بے چہرہ سی امید ہے چہرہ چہرہ 
جس طرف دیکھیے آنے کو ہے آنے والا

اس کو رخصت تو کیا تھا مجھے معلوم نہ تھا 
سارا گھر لے گیا گھر چھوڑ کے جانے والا

دور کے چاند کو ڈھونڈو نہ کسی آنچل میں 
یہ اجالا نہیں آنگن میں سمانے والا

اک مسافر کے سفر جیسی ہے سب کی دنیا 
کوئی جلدی میں کوئی دیر سے جانے والا 

Poet: Nida Fazli